2017-11-19 第十五次全馬 12/11/2017 日本岡山全馬後感 YL To

*另附Eva和Lucia後感

今次日本岡山全馬，一行四人，Eva，Lucia，Polly 和我星期五到達岡山，當中只有三位參賽跑手 - Eva，Lucia 和我。 Polly來支援和支持我們，大家在星期六去取選手包兼去 了倉敷旅遊慢遊半天。岡山馬拉松的Expo在岡山市運動場外的公園，有各式各樣的日本食品售買，運動裝備是有的但基本上沒有多少折扣。但是我們還是也吃了不同地道的食品和玩了一些遊戲，取了一點點的小贈品。下午去倉敷旅遊，在岡山遊覧景點和shopping也是跑海外馬的必要項目。

• 首先 看看Eva 的後感

今次揀跑岡山馬因為覺得個備前燒獎牌有特色，而且有直航，方便喜歡快閃的我。海外參加者不用抽，報完就安心因知道又有得玩😁。

幸運的好天氣，跑得舒服，有藍天之下沿途的風景都特別靚。

岡山，一如其他的日本城市，全程大部分時間都有市民打氣，見住熱情自發的民間打氣團，真係好感動，付出時間同心思去為參加者加油，不用特別原因，就是為了鼓勵！簡單而真摯❤❤

今次我目標是速度平均一點咁跑，雖然都係做唔到，但行少左好多，上斜都冇行😁

希望下次可按身體情況再做好一點點。42公里的跟自己對話，不容易，越來越不容易😭

4:41不是好好的成績，但暫時係得咁多貨🤷🏿‍♀🤣

開心又可以同杜🐍&Lulu一齊玩。特別要多謝杜auntie照顧，更追蹤住我地各人到終點前幫我地影相。陪跑員工作其實比跑馬仔更難，我地專心跑步就可以了，但auntie 就要諗多方面照應。也令我諗起各位曾經陪我跑的家人好友😘

多謝遠方set alarm追蹤我的小呆🤣每一下whatsapp聲我都知係你😁

多謝斜斜的tips and encouragement,不要行不要行😭😭我記足四個鐘的😭😭😭😭😭😭

感激萬🐍，雖然我成日走堂又做唔到一星期70k. I love 九仔一😁😁😁

• 再看看Lucia 寫她的第五次全馬的後感 （長文）感人的報告

在2000年，03年和09年因為盤骨移位壓到神經，經歷過三次幾乎癱瘓…諗起當時最怕就是起身落床，冇10分、8分鐘都坐唔到起來（好似畫漫畫咁，每一下動作都畫一格，一組動作就要畫十格了）。就算坐到起身，又要再用至少5分鐘企起身，呢個過程唔知要痺幾多次，我才可以站起來。但係可以企到，並唔代表行到企到，當時行五步路也要用上10分鐘，簡直惡夢…幸好09年暑假之後開始有好𨍭了…

幾年前，見到身邊的朋友跑得咁開心，激活左我嘅「運動細胞」，諗住當年自己61秒跑到400（雖然係N年前）而家應該差極都有個譜呱，點知…慢跑未夠一個圈已經差D要急救了…死未……😑

之後，我當然的起心肝練習下啦。跟住又膽粗粗跟人報下10k玩下（可惜比賽前毛啦啦拉傷大腿，只可以跑下行下咁完成，當時冇包尾已經偷笑了😂…）。直到去年中，做義工時認識左一班熱愛跑步嘅朋友，受到佢地嘅感染，被鼓勵下報名參加左RMAC青衣班，重新接受正統的長跑訓練（可惜成日撞時間，變左「走堂怪」🙈）。一個未跑多過10K嘅熱血鬥士(即係小女子)又跟人走去台灣跑隻超半馬，仲要負負碌碌以一個笑死人嘅時間攞左個組別冠軍😅。至於我嘅初馬更加係意想不到咁展開，嗰次見到比賽日子同仔仔嘅生日同一日，諗住送個完奬牌比佢做生日禮物，就跟班跑友一齊報名。當每個人都覺得我訓練不足，一定捱唔到返終點，點知最後又比我呢只黑馬過到骨，呵呵呵…

就係咁…我亂打亂撞由16年12月那霸馬拉松開始至今已經跑左5隻全馬了。雖然完賽時間唔算好，甚至响好多人心目中「肉鬼酸」，但對我黎講已經覺得自己好叻叻了😊

我要嘅唔係成績，亦唔會追時間，自問唔係一個勤力嘅跑者，對於刻苦嘅訓練真係怕怕，況且宜家能健健康康行到跑到已經好感恩了。但係我很享受日本嘅馬拉松，因為我5隻馬全部都响日本完成嘅。當地全民投入為跑友打氣，無私咁為跑者提供補給品，食物、生果、當地特產、甚至陣痛噴霧，應有盡有。無論老老幼幼、晴天或雨天，滿街都企滿打氣嘅民眾，令我好感動。正因為咁多姿多采嘅賽道（飲下、食下、玩下、跟D打氣團一齊jam下歌、跳下舞、擊下掌、影下相…）覺得時間過得好快，吾覺吾覺10k又10k…眨下眼就42.195嘞✌！

岡山馬係我第五隻全馬，報名時身體嘅狀態尚算OK，所以當時連報兩隻全馬（10月29日金沢，11月12日岡山）。點知身體响五月尾開始發生狀況，經常頭痛頭暈，成日好攰，所以冇乜點跑，跑好短距離就頂唔順，要休息了。一直到10月19日跟杜sir來一個長課，但所謂嘅長課也只有15k😅…五個月加埋都冇跑夠30k🙈就膽粗粗走去應付隻金沢馬（幸好時限7個鐘，而且隊友們有情有義，冇掉低我，一直做我G4，仲陪住我一齊衝缐…），當日我可以話係「捱」番來的，完成到除左好彩外，真係要多謝班肯同我癲嘅「野人」了😁

講番今次隻岡山馬😅，本來諗住死緊，以現時自己個狀態，仲要兩個星期跑兩隻馬…而且岡山時限得6個鐘…臨出發前仲要有D感冒…典算😩！？ 心諗既然錢又比左，機票又一早買左，酒店都Book埋，死就死啦！曾經試過差D癱瘓都行得番，仲有乜野可以撐唔過丫！？ 唔得，最多到時咪當旅行+做打氣團囉…況且杜sir又肯陪我一齊fun run，有個前輩照住，冇有怕啦😁！於是就秉承之前幾只馬嘅心態「用盡賽道使用權，玩盡佢！以平常心面對，得就得，吾得咪坐回收車囉（坐車也要講資格㗎😎），有乜咁大不了！？唔好比壓力自己，反正跑之嘛，又吾係生死戰😈」

可是感冒越來越嚴重，前一晚仲開始頭痛+失聲😖……搞乜鬼😫……？！唔理了😠！臨瞓前食雙倍份量嘅感冒藥，起身再算…😴😴😴

早上好左DD，於是換戰衣，準備作戰！「輝駝！輝駝！」（FIGHT！）今次是杜sir的第一次cosplay，也是我第一次同佢一齊比賽。我哋以海盜look 示人，耍刀弄槍，沿途同民眾打成一片，氣氛相當high.... 見到樂隊，我地仲來個crossover 一齊jam歌跳舞，好似去左嘉年華會咁😂。杜sir鬼咁好氣，沿途不停吹號角。聽到民眾叫「奸巴爹」，杜sir就會連吹三下「boo boo boo」作回應；聽到「輝駝」（Fight！），佢就「boo boo」。吹足42k，勁到呢…真心佩服👍！

响杜sir嘅領跑下，跑得好舒服，覺得時間過得特別快。到左廿幾k時，杜sir突然同我講：「你有機會Sub 嘟嘟 咼…」當時自己個心「叮」左一下，有個衝動試下sub嘟 嘅滋味。但係大家又受不住沿途嘅「誘惑」，見到好玩嘅又停低，影下相…於是將突然想到嘅「目標」5分鐘…又5分鐘…咁加上去.....最後我哋索性慢條斯理跑最後幾k，寧願爭取多D比大會攝影師射中嘅機會。响運動場內仲要多次企定定影左十幾張相先慢慢跑去終點…結果順利完賽…可以PB…真係非常意外😄

多謝杜sir吾嫌棄我慢呑呑，仲將佢嘅第一次（cosplay run）交左比我😁，衷心多謝您！

為表心意，我將我嘅第一次（寫跑後感）都交比您了😁😜

PS: 特別嗚謝杜auntie，晨早流流幫我梳靚靚頭去「作戰」，衷心多謝您😘！

• 現在才看我的岡山馬短短的報導後感

岡山馬是我的第十五個全馬。跑步，有人好努力不斷去追求PB，有戰戰兢兢地迎接初馬，也有一些跑友只是悠閒地跑，也有不少樂此不彼的cosplay一番，既娛人又娛己，今次我跟cosplay好有經驗的Lucia一起完成了我的第一次 cosplay跑馬。由於下一個星期五是毅行100km的活動，今次要確保不要弄傷及不要過份疲累至為重要，要輕輕鬆鬆跑畢賽事。

賽道從岡山市運動場側的馬路出發，逆時鐘方向，往南行去向岡山南進發，再轉向東走，在旭川轉左往北直趨岡山市運動場內結束。除了上天橋過馬路或過川之外，賽道是相當平坦。賽道有13 個水站和21個廁所位，始終初段至中途的廁所都是長長的人龍，我們去了一間商店的廁所解決生理需要，完全不用排隊哩。有1.5萬全馬選手另有一些跑5km fun run選手參加這一屆賽事。

10'C下起跑，陰陰天但不太凍，跑到中午時太陽高掛，氣溫回升至14C，非常和暖合適長跑，當時我們正在沿旭川北上，風景又更加美麗。從酒店往起跑區只是廿分鐘步行時間，我們出酒店已經見到一大群選手步往岡山市運動場方向，我們也加入人群中。

好好彩Lucia邀請我cosplay扮海盜去跑馬，我還未玩過，當然要去扮下嘢去感受下，手拿有膠刀，有槍又有號角，連埋要拿電話，兩隻手都好忙碌的。三人，Eva，Lucia 和我由Polly 陪同下寄存了行李後便去上線。

我們排在D區，在8:45 嗚槍起步，我們在約六分鐘後到達起跑線起步。展開我的第一次海盜馬拉松賽事，起步後幾分鍾，Eva 已經在前面人群中漸漸遠去，揚翔而去，她今次輕而易舉地又有PB 。

沿途我和Lucia 又揮刀，又弄槍，又用號角和打氣民眾互動一番，又和打氣的樂隊crossover一刻，甚為開心，可能那把膠刀太像真，當揮舞著時，旁邊的選手和打氣民眾被嚇了一跳，似乎沿途收到特別多打氣的支持，大會攝影師也特別關照，甚至在一處，由於我們距離她太近距離了，她特意拿著相機跑遠一點和我們拍照，感激感激。由於賽道中也有很多cosplay打扮的跑手，感覺上好像沿途招搖過市咁，我們的裝扮也相當搶眼球，和其他選手，民眾不斷互動，但有非常輕鬆愉快舒暢的感覺。將來如果有同伴一起cosplay，也會考慮再玩吧。

大會水站在早段10km只有飲料提供飲料，之後水站開始提供香蕉，鹽糖，糥米餅，朱古力等 ，但種類不多，在30km處，大會安排了一個很大地方的食物供應處，由於當時我們仍飽飽的，我們只在外圍經過。另外民間自發性的支援在20km後慚慚多了，噴霧止痛劑也經常見到有提供，Lucia 也享受了幾次這種民間和大會的服務哩。

在好天氣，好氣氛之下，我們都安全愉快的完成賽事，Eva和Lucia都跑到PB，非常好的結果。進入運動場，我們仍然不斷影相才慢慢地衝過終點，見到岡山市市長和岡山市縣知事，我們當然也和他們分別握手及合照一下。很流暢地取了完走毛巾，完走牌和完走證明書，便去和Eva 會合，她已經等候了40分鐘有多。

在日本和澳洲跑了幾次馬拉松，發現日本選手 有一些在初段已經要停下來拉筋或要用噴霧劑舒緩腿部，在澳洲跑的選手好像比較少見到這些現象。

總括來說，岡山馬：
1. 大會流程暢順，Expo 似飲食嘉年華
2. 風景美麗，旭川一段最美
3. 水站提供的食物足夠，但有點單調
4. Cosplay 跑手和民衆多了交流，比較開心一點，感覺良好，好好玩
5. 今次要留力下一個星期毅行100km，和Lucia 輕鬆跑全程最合我的安排

Ps 萬sir 的要求每星期要有70km 對於我這種不專業的跑手是要求高一點吧。